//Sales Generate karne ke 10 Useful Tips
Sales featured image

Sales Generate karne ke 10 Useful Tips

Sales aur salesman, dono hi naam iis desh mein kaafi common hai. Bahut logo ko ye field mushkil lagta hai aur iisi reason se iis field mein log aana nahi chahte. Aur kahin na kahin ye sach bhi hai, lekin agar sahi skill develop kar le toh sales mein achha result generate karna koi badi baat nahi hai.

Har doosre art ki tarah hi mein sales ko bhi ek art maanta hun. The art of making contacts; the art of convincing people; and the art of selling anything and everything with the right information and knowledge to the right people.

Generally, aaj ke date mein adhiktar sales se related jobs mein employee ko monthly target diya jaata hai. Apna job bachane ke liye har employee ko kaise bhi iis target ko achieve karna hi hota hai. Jo bhi salesperson iis art mein expert nahi ban paata usse aage chal ke bahut saare problems aa sakte hai.

Toh chaliye jaante hai 10 aise tareeke jis ko follow kar ke mein itna aage aa paaya.

  • Product ka knowledge

Aapko apne company aur uski products ya services ka complete knowledge rakhna chahiye. Ye aapke customer ko clearly bataane mein help karega ki aapka product doosre products se kaise better hai. Iis se aapka confidence bhi badhega. Agar aapko apne products ke details pata hi nahi hai toh aap apne customer ko convince nahi kar paayenge.

Sab details dene  ke baad customer ko time dena chahiye. Usse baar-baar call ya message karke pareshaan karne se aapka sales neeche gir sakta hai. Bharosa dilana sahi hai lekin bharose ke chakkar mein kisi bhi insaan pe dabav banana bahut galat hai.

Knowledge

  • Be confident

Apni product ya service ko lekar humesha confidently apne client se discuss karein. Agar aap confidently baat nahi kar paaye toh aap apne client ko convince nahi kar paayenge. Iisi ke saath humesha apne language mein shaalinta banaaye rakhein.

  • Avoid over confidence

Kabhi bhi over confidence ka shikaar na ho. Over confidence se mera matlub hai ki aap apne product ya service ke baare mein jyada badha chadha kar na bataayein. Koi bhi commitment karne se bache jo aap poora nahi kar sakte.

  • Always try to identify potential client

Potential customer ka pehchaan karna bahut important hota hai. Aapko humesha iis baat ka dhyaan rakhna chahiye ki aapka customer aapke product ko khareedne ke liye interested hai ya nahi aur woh uss product ko khareed sakta hai ya nahi.

  • Customer ki pasand aur jaroorat ko samjhe

Aapko maalum hona chahiye ki aapka customer kya khareedna chahta hai. Iss baat ko samajhne mein agar galti ki aur usse alag-alag doosre products dikha kar pareshaan kiya toh uska ek bahut negative impact hoga.

  • Customer ke business ki taareef kare

Har insaan ko apni taareef sunna achha lagta hai. Khud ke products bechne se pehle apne client ki dil se taareef karna ek achha tareeka hai. Humesha, taareef ek limit mein karein, kyunki jyada karne pe aksar logo ko samajhne lagta hai ki ye sirf apna kaam nikalwaana chahta hai.

  • Kabhi kisi ko force na karein

Maine bahut baar customers se suna hai aur notice bhi kiya hai ki aksar sales person apni poorani relation aur pehchaan ka hawala de kar client ko sharminda karke sales generate karne lagta hai. Aise kabhi sales nahi badhta aur khud ka value bhi kam hota hai. Iisi ke saath-saath relation pe bhi effect padta hai jo khud ke long run ke liye harmful hai.

  • Circle banaye

Targets achieve karne ke liye, business ya phir sales badhane ke liye apna circle banana kaafi jaroori hota hai. Kisi bhi client ke pass jaaye toh uss se 2 ya 3 contacts toh jaroor pooch lein, jiski help se aapki lead toh badhti hi rahegi aur business bhi regular aata rahega.

  • Be Honest & Build Trust

Insaan ka honesty se bada aur acchha koi aur attitude nahi hota. Kabhi-kabhi aisa hoga ki aapka client aapko jyaada paise de dega ya phir koi scheme lena bhul jaayega tab aap imaandari se uss situation ko sambhaal lein. Iss se aapka client aap pe vishwaas karne lagega jo aapke long run mein bahut kaam aayega.

honesty

Kai baar aisa bhi hoga ki aapka client aapke vishwaas pe kuch aisa khareed lega jo uske kaam ka nahi hai tab aapko har cheez clear kar lena chahiye, kyuni uss time shaayad aapko business mil jaayega lekin long-rum mein ye bahut nuksaandaayak hoga.

  • Apna language aur tone pe dhyaan de

Jab bhi aap kisi customer ko apni service lene ke liye manaane ki koshish kar rahe hote hai tab humesha apni language par gaur kariye ki woh kabhi bhi aisi nahi ho ki unhe ye lagne lage ki uun par koi hukum chala raha hai. Aisa bhi nahi hona chahiye ki unhe lagne lage ki aap apni service ya product dene ke liye desperate ho rahe hai.

Bonus Tip

  • Job change na karein

Agar target achieve nahi ho raha toh job change karne ki jagah aapko market mein khud ka relation banane pe dhyaan dena chahiye. Regularly job change karne se aap market mein apna identity khone lagenge.

For Further Reading

10 Useful Tips for Generating Good Sales (in English)

8 Secrets jo har Sales Manager ko Jaanana Jaroori hai